В новополоцком Дворце детей и молодежи стартовал проект «Лілея сяброўства»
Творчае жыццё Наваполацка ў 2018‑м абяцае быць гарачым. У рамках рэспубліканскай акцыі «Культурная сталіца Беларусі» 31 студзеня ў Палацы дзяцей і моладзі стартаваў галоўны наваполацкі праект года «Лілея сяброўства».
У межах ініцыятывы запланавана правядзенне 16 маштабных мерапрыемстваў. Асабісты акцэнт – на папулярызацыі нацыянальнай беларускай культуры ў кантэксце агульнаеўрапейскай, развіцці міжнароднага супрацоўніцтва.
Сімвалічным адкрыццём праекта стала гарадское дзіцячае свята «Фанты сяброўства» у ПДМ.
Літаральна кожны куточак палаца быў насычаны сусветам муз. Варта было толькі пераступіць парог, як гасцей ласкава сустракалі сябры Мельпамены – вясёлыя мімы.
Пляцоўкі па вывучэнні народных гульняў і танцаў, інтэрактыўныя формы экспрэс-знаёмстваў, займальныя віктарыны, дэкламацыя, майстар-класы па выяўленчаму, дэкаратыўна-прыкладному мастацтву і традыцыйным рамёствам сталі своеасаблівымі міні-мадэлямі таго, чым у рамках праекта будуць займацца наваполацкія школьнікі на працягу года.
З кім паяднае новы праект кожную канкрэтную ўстанову адукацыі, высветлілі падчас лёсавання.
Так, напрыклад, навучэнцы СШ №1 у хуткім часе бліжэй пазнаёмяцца з горадам Электрасталь (Расія), СШ №3 – Гданьскам (Польшча), СШ №4 – Шафай (Францыя), а СШ №5 – Смілтэне (Латвія). Юнакі і дзяўчаты будуць вывучать культуру, геаграфію і традыцыі 15 гарадоў-пабрацімаў Наваполацка.
З прывітальным словам да юных новапалачан звярнуўся старшыня Наваполацкага гарадскога Савета дэпутатаў Алег Буевіч: «Тыдзень таму Наваполацк ганарова адкрыў рэспубліканскую акцыю «Культурная сталіца Беларусі – 2018», і адразу пачаліся мерапрыемствы, якія рэалізуюць гэтую ініцыятыву. Толькі на гэтых выхадных прайшло цудоўнае ліцэйскае свята – вечар вальса. А сёння стартуе праект «Лілея сяброўства», які чырвонай ніткай пройдзе праз увесь блок запланаваных культурных мерапрыемстваў. Выдатна, што менавіта моладзь пачынае рэалізоўваць новыя ініцыятывы. На працягу праекта вы будзеце кантактаваць са сваімі аднагодкамі, даведаецеся шмат новага пра краіны, з якімі сябруе наш горад. Іх гісторыю, традыцыі, казкі, песні, танцы, асаблівасці нацыянальнай кухні.
Праз удзел у гэтых мерапрыемствах зможаце адкрыць свае таленты. Сімвалічна, што сённяшнія мерапрыемствы праходзяць менавіта ў Палацы дзяцей і моладзі – цэнтры эстэтычнага, творчага, інтэлектуальнага развіцця падлеткаў. Я ўпэўнены, што гэта мерапрыемства знойдзе водгук у сэрцах кожнага з вас. На падвядзенні вынікаў рэспубліканскай акцыі «Наваполацк – культурная сталіца – 2018» нам будзе што паказаць і расказаць сваім пераемнікам».
Яскравым дапаўненнем гарадскога дзіцячага свята стаў канцэрт лепшых творчых калектываў Цэнтра культуры, Палаца дзяцей і моладзі, СШ №№2, 4, 7, 14 і гімназіі №1.
Па словах арганізатараў, «Лілея сяброўства» не толькі паспрыяе развіццю міжнародных стасункаў, але і расшырыць круг інтарэсаў юных новапалачан, дасць ім новыя веды і добрых сяброў па жыцці. Усё пачынаецца з дзяцінства. А юнацкае сяброўства, як вядома, самае крэпкае.
Нэлі Радзько
Фота Дзяніса Лешчыка