В музее истории и культуры города открылась выставка новополоцкой художницы Инны Шипило

У музеі гісторыі і культуры горада да 30 лістапада працуе персанальная выстава «Крылы» наваполацкай мастачкі Іны Шыпіла.

Для настаўніка вышэйшай кваліфікацыйнай катэгорыі Дзіцячай мастацкай школы імя І. Ф. Хруцкага гэта далёка не першая экспазіцыя. Іна Шыпіла з’яўляецца ўдзельніцай творчых праектаў у Беларусі і Расіі з 1992 года, між­народных пленэраў – з 2022-га. У 2017 г. яна стала лаўрэатам гарадской прэміі «Прызнанне» і была ўдастоена абласной узнага­роды «За педагагічныя дасягненні». Творы новапалачанкі захоў­ваюцца ў музеях і прыватных калекцыях краін СНД, Прыбалтыкі, Гер­маніі і Сербіі.

Наведвальнікаў музея аўтар знаёміць з гульнёй свету на сваіх нацюрмортах, запрашае ў падарожжа па жывапісных мясцінах Віцебшчыны і прасторных края­відах Пскоўшчыны. Работы Іны Пят­роўны насычаны па каларыце і ў той жа момант напоўнены павет­рам. На адных карцінах яна выкарыстоўвае імпрэсіяналь­ную манеру пісьма, на другіх – натуралістычную, з дакладнай прапрацоўкай дэталяў. Такім чынам майстар пэндзля дорыць гледачам асалоду ад прыгожосці прыроды, а праз яе – магчымасць спасцігаць саміх сябе і адпачываць душой.

Выстава невыпадкова атрымала назву «Крылы». З гэтым звязана цікавая гісторыя. «Недалёка ад старажытнага расійскага Ізборска ёсць археалагічны помнік VII–XVIII стст. – Труварава гарадзішча. Яно разме­шчана на высокім трохкутным мысе над Гарадзішчан­скім возерам. Від адтуль адкрываецца шы­коўны. Пісаць там эцюды – адно задавальненне! На жаль, дажджлівае надвор’е мінулым летам парушыла творчыя планы. Але ўбачанае так ус­хвалявала сэрца, што я села за мальберт проста ў гасцініцы. За ноч нарадзіліся дзве работы з выявай гарадзішча. Я паставіла палотны побач і ўбачыла, што разам пейзажы ўтвараюць крылы… Так і назвала дыптых, а потым і саму выставу», – у размове з карэспандэнтам «НС» падзялілася мастачка.

Нэлі Радзько