Тэатр лялек «КапялюШ» сумесна з валанцёрамі з Уэльса (Англія) далі спектакль для асаблівых дзяцей

Сяброўства амбасады Злучанага Каралеўства Вялікабрытаніі і Паўночнай Ірландыі з народным тэатрам лялек «КапялюШ» Цэнтра рамёстваў і традыцыйнай культуры Наваполацка становіцца мацней.  Па запрашэнні амбасады і англійскай дабрачыннай арганізацыі «Лісце надзеі» калектыў даў спектакль у Рэспубліканскім навукова­практычным цэнтры псіхічнага здароўя (Мінск).

Гледачамі сталі дзеткі з асаблівасцямі псіхафізічнага развіцця. «Батлейка – унікальная культурная з’ява Беларусі. У Полацкім раёне яна была вельмі распаўсюджаная. Тэатр лялек існаваў нават пры езуіцкім калегіуме. У ёй захаваліся мудрасць беларускага народа, тэатральнае мастацтва, наша моўнае багацце. Батлейка нагадвае казку, што вельмі падабаецца дзеткам. Мы прадставілі спектакль на аснове народна­побытавых сцэн. А дапамагалі нам валанцёры арганізацыі – настаўнікі з Уэльса», – у размове з карэспандэнтам «НС» расказаў кіраўнік тэатра «КапялюШ» Андрэй Рэцікаў.

Дарэчы, не так даўно калектыў прыняў удзел у абласным праекце «Лялечны дворык» (Віцебск), за што быў адзначаны дыпломам «За лепшае прадстаўленне батлеечнага спектакля».

Нэлі РАДЗЬКО