Прогноз на 2 недели
У полацкім манастыры знойдзены два ўнікальных артэфакта XII стагоддзя (+відэа)
У Полацкім Спаса-Еўфрасіньеўскім жаночым манастыры пры археалагічных раскопках ў ліпені знойдзены дзве плінфы XII стагоддзя. Адна з іх дапаўняе малюнак чалавека з музычным інструментам і ўзнаўляе карцінку з мінулага. Другі фрагмент плінфы ўяўляе малюнак пояса.
У канцы мая бягучага года пры археалагічных раскопках ля сцен Спаса-Праабражэнскага храма Спаса-Еўфрасіньеўскага жаночага манастыра групай археолагаў з Полацкага дзяржуніверсітэта была знойдзена плінфа XII стагоддзя з выявай музыканта. Унікальны артэфакт адразу стаў сенсацыяй. У хуткім часе навукоўцам зноў пашчасціла!
Напачатку ліпеня археолагі пад кіраўніцтвам старшага выкладчыка кафедры гісторыі і турызму Полацкага дзяржуніверсітэта Аляксея Коца знайшлі яшчэ адзін кавалак плінфы з выявай другога музыканта.
Аляксей Коц, старшы выкладчык кафедры гісторыі і турызму ПДУ:
– На плінфе адсутнічае частка малюнка, дзе павінна быць галава, але ніжняя захавалася амаль цалкам. Касцюм арганічна дапаўняе папруга з кутасом. У руках ён трымае падобны на музычны інструмент – прадмет з павелічэннямі на канцах. На нагах апрануты нейкі абутак, перавязаны ніткамі.
Два знойдзеных кавалка плінфы маюць адну прыроду і стылістычную еднасць, таму Аляксей мяркуе, што гэта фрагменты аднаго малюнка.
Аляксей Коц, старшы выкладчык кафедры гісторыі і турызму ПДУ:
– Другі малюнак размешчаны на баку плінфы, што дае падставу сцвярджаць, што фігурак было толькі дзве. Мы маем своесаблівы фольк-бэнд ХІІ стагоддзя. Для Беларусі выява аднаго музыканта – унікальная, а дзве – яшчэ больш ўнікальныя. Падобных малюнкаў музыкаў у нас яшчэ не знаходзілі.
Дарэчы, падчас раскопак групе археолагаў патрапіў яшчэ адзін цікавы фрагмент плінфы. Ён значна танчэй па таўшчыні і паходзіць не з «музычнай сям’і» знакамітай цагліны. Гэта выява арнаментаванага пояса. Даволі рэдкі экзэмпляр. Дагэтуль археолагі сустракалі падобныя ўзоры толькі ў інтэр’еры Спаса-Праабражэнскага храма.
Нэлі Радзько, фота аўтара
Відэа Ларысы Сцёпкінай
Вам будет интересно почитать:
