Новополоцкие «Звонкие голоса» заняли 3-е место в Республиканском смотре-конкурсе хорового творчества «Спяваем разам»

Узорны хор «Звонкія галасы» імя Альберта Кажушкевіча сярэдняй школы №3 імя В. В. Шчарбакова заваяваў дыплом лаўрэта ІІІ ступені на Рэспубліканскім аглядзе-конкурсе харавых калектываў «Спяваем разам».

Удзел у творчым спа­борніцтве прынялі акадэмічныя і народныя харавыя калектывы ўстаноў дадатковай і агульнай сярэдняй адукацыі з усіх куткоў Беларусі. Сёлета ў абласных этапах выступілі 109 калектываў – гэта каля 2 200 навучэнцаў.

Фінал прайшоў у сталіцы краіны напачатку красавіка. У першы дзень конкурсу 18 калектываў з усіх абласцей Беларусі сабраліся ў зале Нацыянальнага цэнтра мастацкай творчасці дзяцей і моладзі. Кожны падрыхтаваў прывітанне-крычалку і песенны твор. Пасля лёсавання пачалося праслухоўванне. Наваполацкія «Звонкія галасы» паказалі высокі ўзровень выканання харавых партытур «Can you hear me», «Камара», «Ave Maria», «Дзень-залацень». Увечары юных артыстаў чакала радасная падзея: іх запрасілі прыняць удзел у гала-канцэрце.

Выступленне пачалося з агульнага выканання твора беларускіх аўтараў Ігара Лучанка, Леаніда Захлеўнага «Завешся ты ласкава Белай Руссю» і прадоўжылася лепшымі конкурснымі нумарамі. Найбольш прыемным момантам мерапрыемства стала ўрачыстае ўзнагароджанне. Міністр адукацыі Рэспублікі Беларусь Андрэй Іванец і дырэктар Нацыянальнага цэнтра мастацкай творчасці дзяцей і моладзі Надзея Васільчанка ўручылі дыпломы пераможцам прэстыжнага рэспубліканскага конкурсу «Спяваем разам».

Наш хор падняўся на трэцюю прыступку конкурснага п’едэстала. У гэтым вялікая заслуга кіраўніка Жанны Прыданавай, канцэртмайстра Інэсы Башмаковай і ўсіх юных удзельнікаў калектыву.

Лізавета Бахерава,
навучэнка 9-га класа СШ №3
імя В.В.Шчарбакова,
удзельніца хору «Звонкія галасы»