Пейзажи, натюрморты и даже портреты знаменитой художницы Фриды Кало – талантливые первоклассники БШ №10 из творческой группы продленного дня представили выставку картин

Велікодныя ласункі, жывёлы, кветкі, казачныя матывы, святочныя сюжэты, нацюрморты, калажы і нават партрэты знакамітай мастачкі Фрыды Кало – у базавай школе №10 раскінулася сапраўдная «Вясёлка дзіцячых малюнкаў».

Яе аўтары – першакласнікі, што наведваюць заняткі па выяўленчаму мастацтву ў групе падоўжанага дня. Пад кіраўніцтвам педагога – знакамітага наваполацкага майстра лакавай мініяцюры Марыны Івановай – юныя творцы ўсяго за паўгода стварылі 144 работы. Асабліва вылучылася сямігадовая Вікторыя Апалька. Яна намалявала 22 міні-карціны. У школе адзначаюць, што Віка вельмі адказная і таленавітая дзяўчына, вучыцца на выдатна. На занятках у Марыны Мікалаеўны асвоіла пастэль, новую тэхніку пісьма «пузыркамі» і сёння адказна заяўляе, што ў будучым марыць стаць мастаком.

Прагне да творчасці і васьмігадовы Георгій Яскевіч – будучы майстар пейзажу. «Мне падабаецца пісаць прыроду. Намагаюся, каб мае малюнкі былі яркімі, прыгожымі. Слухаю парады на­стаўніка», – гаво­рыць Георгій.

Выстава выклі­кала сапраўдны рэзананс у школе. Вучні і педагогі пішуць добрыя водгукі, бацькі задаволены поспехамі сваіх дзяцей. «На занятках я прапаноўваю да пяці тэм на выбар. Ужо на гэтым этапе хлопчыкі і дзяўчынкі пачынаюць прымаць самастойныя рашэнні, думаць над ідэяй. Галоўнае – навучыць іх не проста адлюстроўваць сюжэт, а правільна размяшчаць аб’екты, каб атрымлівалася цэласная кампазіцыя.

У працэсе вучу юныя таленты пачуццю прапорцыі і параўнальнаму аналізу: як толькі намалюем, прымацоўваем на дошку і разам разбіраем, што трэба яшчэ дамаляваць», – адзначае Марына Іванова.

Нэлі Радзько
фота аўтара

Заставайцеся з намі ў Telegram!