Фольклорный ансамбль «Ажыначкі» Дворца детей и молодежи удостоен почетного звания «образцовый»
Фальклорны гурт «Ажыначкі» Палаца дзяцей і моладзі г. Наваполацка цяпер будзе з гонарам звацца ўзорным. Гэты статус калектыву напачатку ліпеня прысвоіла рэспубліканская атэстацыйная камісія Міністэрства культуры Беларусі.
На творчым небасхіле горада калектыў заззяў у 2016 годзе. Заснавала яго вопытны педагог і высокапрафесійны музыкант Алена Зачук. Ідэю імя навеяў сацыяльны праект «Смак беларускай мовы». «Мы доўга разважалі, як лепш, гучней звацца. Аднойчы я ехала ў аўтобусе і ўбачыла па дарозе вялікі рэкламны білборд з выявай ажыны. Падумала, а чаму не? Скінула ў агульны чат. Маім юным спевакам прыйшлося даспадобы. Так і назваліся», – расказвае Алена Георгіеўна.
За шэсць гадоў працы гурт заваяваў больш за тры дзясяткі дыпломаў з творчых конкурсаў самага рознага ўзроўню. Пачэснае месца сярод іх займаюць крыштальныя зубры – узнагароды за першыя месцы на рэспубліканскім конкурсе «Юныя таленты Беларусі». Удзельнікі калектыву не толькі спяваюць аўтэнтычныя песні, але і граюць на музычных інструментах (беларускай дудзе, бубне, вялікім вясельным барабане, скрыпцы), танчаць, ведаюць традыцыйныя гульні і паказваюць народныя абрады. Матэрыял кіраўнік ашчадна збірае па энцыклапедычных даведніках, старых запісах, а калі ёсць час – самастойна выпраўляецца ў этнаграфічныя экспедыцыі. Кожны адноўлены абрад педагог метадычна раскладвае на састаўныя: «Вы, пэўна, заўважылі, што наш гурт вымаўляе беларускія словы па-іншаму. Гэта полацкі дыялект, які я вывучаю на працягу ўсёй сваёй прафесійнай дзейнасці». Дарэчы, Алена Зачук неаднаразова прымала ўдзел у рэспубліканскіх навукова-практычных канферэнцыях, майстар-класах па адраджэнню і зберажэнню народных традыцый.
На пытанне, як зацікавіць дзяцей народнай традыцыяй, Алена Георгіеўна адказвае:
– Тут важна асоба настаўніка. Не толькі тое, як ён умее данесці матэрыял, але і як будуе адносіны ўнутры калектыву. Перад рэпетыцыяй мы можам абмяркоўваць з навучэнцамі іх настрой, частавацца гарбатай з цукеркамі, але ў час працы спуску няма нікому. Тэмп высокі, асіліць матэрыял могуць толькі адказныя дзеці. Народная традыцыя не даруе абыякавасці.
Сапраўднае этнічнае мастацтва адрозніваецца энергетычным напаўненнем. Паглядзіце, як раней спявалі бабулі на вёсцы. Адна зацягнула, астатнія падхапілі, пачалі пакачвацца. У гэты момант вакол іх быццам узводзіцца крыштальны палац прыгожай, чыстай, правільнай энергетыкі. Гэта перадаецца слухачу. Ён адчувае сябе напоўненым.
Калі дзеці бяруць аўтэнтычны матэрыял, іх твары адухаўляюцца. Архаічная песня перадаецца з пакалення ў пакаленне па крыві, адгукаецца ў сэрцы. Таму яна неўміручая і такая родная кожнаму з нас.
Нэлі РАДЗЬКО