Награды на международных конкурсах завоевал ансамбль народной песни «Дзвінскія пералівы» Новополоцкого музколледжа

Багаты ўраджай узнагарод у маі сабраў ансамбль народнай песні «Дзвінскія пералівы» Наваполацкага музкаледжа. 

На І Міжнародным ра­сійска-індыйскiм шматжанравым конкурсе «Латмар Холі» (г. Нью-Дэлі, Індыя), які праходзіў у межах фестывалю мастацтваў «Культурны абмен», калектыў стаў лаўрэатам І ступені. Аналагічны дыплом, толькі ў іншай намінацыі, на спаборніцтве ўзяла са­лістка ансамбля Варвара Калесніковіч. Юная зорачка, навучэнка школы практыкі пры музкаледжы Варвара Бароўская стала лаўрэаткай ІІІ ступені. Фестываль праводзіўся пры падтрымцы Камітэта культуры Валгаградскай вобласці і сабраў больш за 1 000 канкурсантаў з Беларусі, Расіі, Марока, Чарнагорыі, Францыі, Індыі.

У Мінску на юбі­лейным V Міжнародным шматжанравым расійска-беларускім фестывалі-конкурсе «Славянскае сваяцтва» «Дзвiнскiя пералiвы» пацвердзілі свой высокі статус і зноў узялі першае месца. Варвара Калесніковіч стала другой сярод салістаў. Яшчэ адна навучэнка музкаледжа Аліна Хацкевіч (выкладчык Таццяна Сцяпанава) заваявала званне лаўрэаткі ІІ ступені. А Варвара Бароўская прывезла дадому дыплом ІІІ ступені. Пераможцы атрымалі брэндавыя кубкі і прызы.

Парадавалі новапалачан вынікі Усера­сійcкага конкурсу-фесты­валю «Серпанцін мас­тацтваў» (г. Севастопаль, Расія), на якім ансамбль і яго вакалістка Надзея Чучман сталі лаўрэатамі І ступені з народнымі песнямі «Ой, там за лесам» і «Камары гудуць».

За выдатную падрыхтоўку канкурсантаў кіраўнік калектыву Нэлі Бароўская і канцэртмайстар Аляксандр Казарэўскі былі адзначаны лістамі падзякі.

Нэлі Радзько