Дзіцячая бібліятэка імя А. Пушкіна далучылася да рэспубліканскай ініцыятывы «Кожная пятніца – роднае, сваё»

Установа прапана­вала наведваль­нікам дзіцячай паліклінікі літара­турны медыяпраект «Беларуская чытанка». Ён спалучае сучасныя магчымасці тэхнікі і Інтэрнета, анімацыю, тэатралізацыю, класіч­нае ўспрыманне друкаванай кнігі як каштоўнасці.

З 10 красавіка кожную пятніцу маленькія новапалачане, чакаючы прыём у доктара, маюць магчымасць пазнаёміцца з якаснымі творамі беларускай дзіцячай літаратуры, палюбавацца прыгажосцю роднага краю і паслухаць разам з бацькамі творы на мілагучнай мове, якія будуць трансліравацца на другім паверсе медустановы.

Праект «Беларуская чытанка» існуе ўжо пяць гадоў. У ім бібліятэкары чытаюць творы, якія суправаджаюцца адпаведнымі ілюстрацыямі для лепшага ўспрымання і разу­мення маленькімі слухачамі. Гатовы медыяпрадукт распаўсюджваецца ў віртуальным асяроддзі: на сайце ЦБС і ў сацыяльнай сетцы УКантакце, а зараз яшчэ і на экране дзіцячай паліклінікі.

– Супрацоўнікі бібліятэк са шкадаваннем вымушаны прызнаць, што сёння беларуская мова стала для падрастаючага пакалення амаль замежнай. У рамках школьнай праграмы дзяўчынкі і хлопчыкі, як правіла, вывучаюць граматыку, арфаграфію, сінтаксіс, у той час як маўленчыя навыкі так і застаюцца для іх малазасвоенымі. Таму неабходна, каб дзеці часцей слухалі, разумелі, ведалі родную мову, каб валодалі правільным беларускім вымаўленнем, – адзначыла загадчыца дзіцячай бібліятэкі імя А. Пушкіна Таццяна Варанец.

Арганізатары акцыі запрашаюць усіх пазнаёміцца з творамі, падрыхтаванымі для праекта, і наведаць чытальную ўстанову па адрасе: вул. Юбілейная, 1, дзе юным новапалачанам прапануюць цікавыя прыгоды, захап­ляльныя гісторыі і новыя знаёмствы разам з героямі кніг лепшых беларускіх аўтараў.

Сваімі ўражаннямі пра ўбачанае можна падзяліцца ў сацыяльных сетках з хэштэгам #ДзеньРоднагаСвайго.

Наталля МАТУЛЕЎСКАЯ
фота Віктара Арлова