На площадке возле Центра ремесел и традиционной культуры г.Новополоцка прошел праздник «Гуканне вясны»

Музыка, гульні, майстар-класы, тэатр лялек і танцы пад гармонік. У мінулую надзелю каля Цэнтра рамёстваў і традыцыйнай культуры разгарнулася свята беларускага народнага каляндара Гуканне вясны.

Спецыялісты ЦРіТК пад­рыхтавалі для гара­джан насычаную праграму. Вядучая мерапрыемства – метадыст па народных рамёствах Кацярына Усовіч расказала прысутным гісторыю абраду, звязанага з адраджэннем квецені, набліжэннем цяпла. У розных куточках Беларусі гукаць вясну пачыналі ў свой час. Абрад не меў канкрэтнай даты, аднак зрабіць гэта стараліся да Даб­равешчання. Адмысловым сім­валам свята былі жаўрукі. Іх выявы і прапанавалі зрабіць гасцям на майстар-класе. Тэкстыльных птушачак сабралі разам і пад працяглае «гу-у-у» падкідвалі на вялікай хустцы.

Каб хутчэй абудзіць зямлю ад халоднага надвор’я, арга­нізатары запрасілі гараджан у карагод каля імпра­візаванага «Дрэва жыцця», якое загаддзя ўпры­гожылі стужкамі-пажаданнямі. Пад сакавіты вакал гурта архаічных спе­ваў «Княжыч» новапалачане весела танцавалі і ўдзельнічалі ў стара­даўніх бела­рускіх забавах «Што й па ель­нічку», «Проса», «Гары-гары ясна», «Іванька». У перапынках набывалі
сувеніры ручной работы клуба майстроў «Прамень», частаваліся хатнім печывам і духмянай гарбатай з самавара. Дарэчы, спецыяльна для гасцей працаўнікі цэнтра выпеклі больш за паўсотню прыгожых здобных «жаўрукоў».

Свята народнага календара Гуканне вясны распачало цыкл фестываляў сямейнага адпачынку, якія па нядзелях будуць праводзіцца ў парку культуры і адпачынку горада. Яркім акцэнтам мера­прыемства стаў паказ інтэр­медый ад тэатра лялек «КапялюШ». Невялікія камічныя п’есы даносілі да кожнага жывую беларускую мову, на якой калісьці размаўлялі нашы прабабулі і прадзядулі.

Алла з унучкай Сафіяй:

– Намагаемся не прапускаць мерапрыемствы цэнтра. Сёння прыйшлі амаль што ўсёй сям’ёй. Свята падарыла шмат доб­рых уражанняў. Усё спадабалася. Асабліва майстар-клас для дзяцей, падчас якога ўнучка даведалася пра сакральнае значэння птушак ў жыцці беларускіх сялян. Дзякуй спецыялістам ЦРіТК за такую магчымасць.

Святлана і Галіна:

– Мы даўнія прыхільніцы дзейнасці ЦРіТК. Раней нават наведвалі клуб па лапікавым шыцці «Колеры». Сёння ў маці дзень нара­джэння. Ёй споўнілася 77 га­доў. Святкаваць пачалі з мерапрыемства ў цэнтры. Ат­рымалі шмат станоўчых эмоцый.

Ганна:

– Я культуролаг па спецыяльнасці, таму мне блізка мастацтва ва ўсіх яго праяўленнях. Такія святы якраз і дапамагаюць перажыць сапраўдныя эмоцыі ад фальклорных традыцый, адчуць багацце роднай мовы, хараство аўтэнтычнай песні.

Нэлі Радзько

Фота аўтара