В Новополоцке подвели итоги конкурса на лучший «Птичий дом»

23 сакавіка ў бібліятэцы імя У.Маякоўскага падвялі вынікі адкрытага гарадскога конкурсу «Птушкін дом». На званне лепшай шпакоўні прэтэндавала 114 прац. За час правядзення творчага спаборніцтва яго арганізатары атрымалі шмат шчырых слоў і добрых водгукаў ад гараджан.
На падвядзенні вынікаў у бібліятэку сабралася вялікая колькасць гасцей. Мерапрыемства наведалі і прадстаўнікі адміністрацыі горада. Урачыстую цырымонію ўзнагароджвання правёў намеснік старшыні Наваполацкага гарвыканкама Альберт Шакель.

У намінацыі «Аптымальны варыянт» (які адказвае патрэбам і стандартам жылля для птушак) перамога была на баку Дар’і Герасімовіч і яе бацькі Юрыя Аляксандравіча. Другое месца заваяваў супрацоўнік Цэнтра рамёстваў і традыцыйнай культуры Валерый Цімашоў.

На трэцяй прыступцы п’едыстала аказалася ААТ «Нафтазаводмантаж».

Самай прыгожай і арыгінальнай шпакоўняй у намінацыі «Казачны палац» была прызнана праца супрацоўніка СШ №15 Данііла Грышмана.

Другое месца ў гэтай намінацыі заняла хатка для птушак ад вытворчасці №7 ААТ «Нафтан». Трэцяя пазіцыя – у Ягора Баравога і яго бацькі Міхася Іванавіча.

Найбольш доўгачаканым і інтрыгуючым стаў «Прыз глядацкіх сімпатый». Лепшую працу новапалачане выбіралі ў сацыяльнай сетцы «ВКонтакте» у групе «Моладзь Наваполацка» на працягу двух тыдняў. Удзел у анлайн-галасаванні прынялі больш за 3 000 чалавек.

Па яго выніках пераможцам стаў творчы калектыў АТП №6.

Спецыяльны прыз ад грамадскай арганізацыі «Ахова птушак Бацькаўшчыны» атрымаў калектыў яслей-сада №34.

Усім удзельнікам конкурсу ўручылі падзякі, а пераможцам – яшчэ і каштоўныя падарункі ад арганізатараў конкурсу: гарадскіх грамадскіх фарміраванняў «Беларускі фонд міра», «Беларускі рэспубліканскі саюз моладзі», «Федэрацыя прафсаюзаў Беларусі», грамадскага аб’яднання «Ахова птушак Бацькаўшчыны».

Урачыстую цырымонію ўзнагароджвання суправаджалі яркія канцэртныя нумары ў выкананні творчай моладзі Наваполацка.

Нэлі РАДЗЬКО
Фота Таццяны Русаковіч