В музее истории и культуры подвели итоги городского конкурса декоративно-прикладного искусства «Навагодні цуд»

У музеі гісторыі і культуры падвялі вынікі гарадскога конкурсу дэкаратыўна-прыкладнога мастацтва «Навагодні цуд». Партнёрамі творчай ініцыятывы выступілі Наваполацкія аб’яднанні грамадскіх арганізацый «Беларускі фонд міру» і «Беларускі саюз жанчын».

Творчае спаборніцтва прайшло ўпершыню. Сваёй мэтай яно ставіла захаванне і развіццё разнастайнасці культурнай спадчыны Беларусі, а сярод асноўных задач – умацаванне сямейных традыцый, развіццё вобразнага мыслення і творчых здольнасцяў юнага пакалення, выхаванне высокіх духоўных якасцяў, датычнасці да багатай спадчыны нашага народа, яго гісторыі і мастацтва.

Конкурс прыйшоўся даспадобы новапалачанам. Цацкі выраблялі па матывах беларускага фальклору, казак, легендаў, міфаў, святаў народнага каляндара. Пры стварэнні дазвалялася выкарыстоўваць любыя матэрыялы і тэхнікі, аздабляць элементамі арнаменістыкі, расліннага і жывёльнага свету (вобразы флоры і фаўны Рэспублікі Беларусь). Прыарытэт надаваўся аб’ёмным творам. Свае ёлачныя ўпрыгожванні таленавітыя гараджане майстравалі ў трох намінацыях: «Зімовая казка», «Беларускія традыцыі», «Прыз глядацкіх сімпатый». Гатовыя творы прыносілі з 1 па 22 снежня. Усяго паступіла 56 работ.

Вынікі падвялі 18 студзеня. Пераможцаў заахвоцілі граматамі і памятнымі прызамі. Пятнаццаць канкурсантаў сталі ўладальнікамі спецпрызоў ад музея і гарадской арганізацыі ГА «Беларускі саюз жанчын».

У намінацыі «Беларускія тра­дыцыі» першае месца заваявала Таццяна Пісарук з наборам на­вагодніх цацак, вышытых нацы­янальнымі ўзорамі. Праца была не толькі выдатна зроблена, але і арыгінальна аформлена ў драўляны футляр з назвай конкурсу. Другое месца ўзяла Яна Яскевіч. Трэцяе падзялілі Ксенія Папова, Ірына Петухова і Ірына Грабоўская.

У намінацыі «Зімовая казка» журы конкурсу аддала перавагу самаробнаму шарыку ў тэхніцы качанне з воўны, які вырабіла юная вучаніца Дзіцячай мастацкай школы імя І.Ф. Хруцкага Соф’я Поверава.

Другое месца заваявала Жана Камеш. На трэцяй прыступцы конкурснага п’едэстала – Крысціна Жукава.

З 24 снежня 2021-га па 1 студзеня 2022-га ў соцсетках арганізавалі анлайн-галасаванне. Удзел у ім прынялі больш за 700 гараджан. Найбольшую колькасць упадабанак набралі Вадзім Юрчанка, за яго працу прагаласавала 170 рэспандэнтаў, і Марына Талкачова – 104 карыстальніка суполкі музея «УКантакце» паставілі працы дзяўчынкі «сардэчкі».

– Вельмі прыемна, што гараджане актыўна адгукнуліся на нашу ініцыятыву. Працы на сам рэч прыносілі вельмі прыгожыя, арыгінальныя, у самых розных тэхніках і матэрыялах. Былі нават цацкі са звычайных макарон. А колькі цікавых варыяцый навагодняга шарыка нам прадставілі! Неабходна адзначыць якасць конкурсных работ, што зноў і зноў пераконвае – новапалачане вельмі таленавітыя! Усім вялікі дзякуй! Сачыце за намі ў соцсетках і на сайце. Мы будзем радаваць вас новымі прапановамі», – на цырымоніі ўзнагароджвання сказаў дырэктар музея гісторыі і культуры Уладзімір Бяляеў.

Нэлі РАДЗЬКО
фота Анастасіі Грыгарэнка