Новополочане заняли весь пьедестал почета Международного фестиваля «ART-PANORAMA Россия 2021» в Москве

Новапалачане занялі ўвесь п’едэстал пашаны Міжнароднага фестывалю-конкурсу дзіцячай і юнацкай творчасці «Art-Panorama Расія 2021»!

Маштабны культурна-пазнавальны праект сабраў больш за 400 удзель­нікаў з розных рэгіёнаў Бела­русі і Расіі. Трохдзённая праграма ўключала канцэртную частку, конкурс­ныя выступленні, майстар-класы, знаёмства з гістарычнымі і куль­турнымі славутасцямі Масквы. Праект транс­ліравалі па адным з ра­сійскіх тэлеканалаў.

Новапалачане гучна заявілі пра сябе ў намі­нацыі «Вакальна-харавая твор­часць, народны вакал». Пра­фесійна, ярка, эмацыянальна выступіла навучэнка 2-га курса спецыяль­насці «Дырыжыраванне (народны хор)» Наваполацкага музкаледжа Варвара Калес­ніковіч. Самабытнасць вы­-
канання беларускіх аўтэнтычных песень «А ручай коціцца, ды гуляць хочацца» і «Ой, сярод двара» прынесла 18-гадовай спявачцы Гран-пры фестывалю і каштоўны прыз. Яе маленькая цёзка – вучаніца школы практыкі пры музкаледжы Варвара Бароўская – атрымала дыплом лаўрэата ІІ ступені.

З выдатнымі вынікамі дадому вярнуліся і артысты Цэнтра культуры г. Нава­полацка. Вакальная група ўзорнага ансамбля танца і песні «Прыдзвінскія россыпы» стала лаўрэатам І сту­пені. Спевакі выка­налі народныя песні «Штой на нашай вуліцы» і «Добра гаспадынька» (аранжыроўка Нэлі Бароўскай і Ігара Валь­коўскага). На другую прыступку конкурснага п’едэстала падняўся саліст «рос­сыпаў» Вадзім Пазняк. Дарэчы, у сталіцы Расіі калектыў выступіў у новых касцюмах, пашытых спецыялістам цэнтра Ірынай Мясаедавай.

«Нягледзячы на сцюдзёнае надвор’е, конкурс пакінуў у нашых сэрцах толькі самыя цёплыя ўспаміны. Трапяткое, добрае стаўленне журы да выканаўцаў настроіла на пазітыўны лад. Гала-канцэрт фестывалю праходзіў у Амбасадзе Беларусі ў Расіі, што дадало праекту асабістай элітарнасці», – у размове з карэспандэнтам «НС» расказала педагог музкаледжа і кіраўнік вакальнай групы ансамбля «Прыдзвінскія россыпы» Нэлі Бароўская.

Нэлi РАДЗЬКО