Хто можа стаць удзельнікам праекта «Адкрыць талент у кожным», які дзейнічае ў Наваполацку у рамках Года народнага адзінства
У межах Года народнага адзінства Наваполацкая цэнтралізаваная бібліятэчная сістэма запусціла новы праект «Адкрыць талент у кожным». Як адзначае яго галоўны ініцыятар – бібліёграф ЦБС Кацярына Коршунава, асноўная мэта ідэі – прадставіць шырокаму колу гледачоў творчыя памкненні гараджан.
Кацярына Коршунава, бібліёграф ЦБС:
– Што заўсёды яднае розных людзей? Захапленні, майстэрства, творчасць. У нашым горадзе шмат цікавых па натуры асоб, якія чым толькі не займаюцца… Нам хочацца расказаць пра іх, паказаць на нашых пляцоўках. Гэта могуць быць прадстаўнікі самых розных прафесій, якія ў вольны час займаюцца мастацтвам, музыкай, літаратурай, фатаграфіяй… Мы адкрыты для сутворчасці з усёй краінай. Рады будзем арганізаваць выставу ці творчы вечар гасцей з іншых гарадоў і вёсак».
Першай ластаўкай новага праекта стала персанальная выстава дэкаратыўна-прыкладнога мастацтва «Творчы калейдаскоп» майстра з жывапіснага гарадка Бароўка Лепельскага раёна Марыі Хасанавай. Увазе наведвальнікаў яна прапанавала звыш 70 арыгінальных работ па некалькіх накірунках дэкаратыўна-прыкладнога мастацтва (лялькі-абярэгі, плеценыя вырабы з паперы і інш.). Большую частку экспазіцыі складаюць карціны, выкананыя ў тэхніцы «алмазная мазаіка». Выявы на іх пераліваюцца яркімі фарбамі рознакаляровых страз. Пабачыць выставу можна да 21 лютага. А самому стаць удзельнікам праекта – калі заўгодна. Падрабязная інфармацыя размешчана на новай віртуальнай пляцоўцы «Арт-ciцi» сайта ЦБС novopolotsk-lib.by.
Нэлі РАДЗЬКО